ليوما جيت نهضر ليكم على واحد الظاهرة خطيرة كثرات بزاف لي هي النقلة واش ملاحضتوش بيلا كلشي معول يدوز غير بالنقيل شي داير الحجابات شي كيتكيت شي داير لاستيك ملصق فيه الوراق المهم كلشي ناوي على خزيت و العدو الاول قبل من الامتحان هوما الاساتذة لي كيحضيو مرة كيجيك متساهل مرة البق ميزهق و كيولي يبانليك بنادم كيافاف و عرقان و غنعاودليكم على شي حوادث طراو:
واحد النهار فالوطني الدرية جالسة معليها مابيها تا دارت باخزدردلاخ مالها سخفات نوضات الروينة بنادم نايض يشوف مالها ولي ذكي جابد النقلة لقاها فرصة و مناسبة المهم خرجوها جابوليها الما ناضت قالتليهم بغيت نمشي لطواليط داوها السيدة قادات النقلة و جات معلمة زعما جات للباب بحالا عاقو بيها قلبوها لقاوها جايبا جوطية ديال الوراق طردوها ايوا هذي هي وقت السخفة ديال بصح
و انا مكاين لي كيسالي معايا قد هادوك لي كيديرو لاستيك لي كيتجبد كيديرو الفوق و كيجر واحد الساطة دايراها جبدت لاستيك زلقليها ضربها و هي تزوك وااااااااااااع تفرشات باي باي حبيبة
و كاين لي جايب ميكة ديال الوراق الحجابات واحد المكلخ جبد بزاااااااااااف كيقلب على النقلة مين وحل جلس عليها و الاساتذة حاضييين البق مايزهق صونات الساعة مبغاش ينوضليهم تما لصق الكلاخ راك مشيتي فيها مشيتي فيها غير نوض زعما غتبقا تما تال يوم القيامة
و المشكلة الكبيرة بالنسبة ليا انا هي هادوك لي كينقلو و مكيعرفوش اش ينقلو اما كيكتب كلشي ولا كيكتب شيحاجة من غير داكشي لي مطلوب
بحال واحد النهار فالجهوي كيدوزو التربية الاسلامية جوج دراري كيتناقلو امين و سمير
سمير : بس بس صاحبي السؤال لول الله يحفضك
امين: حرام
سمير: وا غا لول اصاحبي مالك داير فيها مفتي
امين:حرااااااااااام
سمير : ارا الثالت لا فهمتي فيه شيحاجة
امين: من غشنا ليس منا
سمير: وا فالفرض اصاحبي كتولي داير فيها نتا هو القزابري تا نخرجو و نتفاهم مع مك
فاش خرجو جا سمير كيعربط على امين داير فيها واعر اصاحبي قلبتي وجهك ماشي رجلة هادي
امين وا صاحبي قلتي اللول و الثاني عطيتهومليك اش بغيتي
سمير وا من الصباح و نتا داير فيها عمرو خالد ها حرام ها من غشنا فليس منا
امين وناري شحال مكلخ اصاحبي هادوك راه الاجوبة السؤال لول الجواب الشرعي هو حرام
و الثالث قاليك جيب دليل من النصوص الشرعية لي هو من غشنا فليس منا
لي عجبو يدير رد لي معجبوش يسمحلينا على الحموضة
