-هدا واحد الراجل مخاصم مع الزوجة ديالو. كتب ليها: غدا فيقيني مع 6 صباحا...لكن ما فاق حتى 12 ...وهو يلقاها كتبا ليه : فيق راه 6 ديال الصباح.
-هذا واحد الطفيلي، دائما يتدخل فيما لا يعنيه، واحد النهار لقى الناس مجمعين على حادثة سير، وهو يقول ليهم خلوني ندخل أنا أخ الضحية، ملي دخل، لقى حمار ميت.
-وحدة كانت مع صاحبها ..وفجأة بان باها..قالت ويلي ويلي بابا..قالها ..ماتخافيش قوليلو أنا خوك.
-واحد كايقولوا ليه الحاج شلاظة .كعا من السمية.. مشا هاجر شي 30 عام باش انساو... رجع هوا يشوفوا واحد صاحبو قديييم.. قال ليه واش نتا هوا الحاج بصلة اولا مطيشة اولا خص... الحاج قال ليه تخلطها نخلط مك.
-هادا واحد مراتو خارجة عليه، ديما هو كيغسل المواعن .. واحد نهار جلس يعاود لواحد صاحبه جا هو قاليه هاد المرة ملي تدخل للدار مع الدخلة غوت عليها و قول ليها واش كاين شي غدا.
مشا هو دخل للدار و غوت بالجهد :حناااااااااااااان ... و هي ترد عليه بجهد كتار : ماااااااااااااااااااااااالك؟؟؟؟
قال ليها : كاين شي مواعن نغسلهم؟؟؟
-هادي واحد المرا كبيرة وحشومية بزاف مشات تقرا ف محو الأمية
وكان العنوان ديال الدرس : دخل أحمد، خرج أحمد
ملي تقول المعلمة: دخل أحمد، كدير المرا الزيف على راسها
وملي تقول المعلمة: خرج أحمد، كتحيد المرا الزيف على راسها
ملي مشات للدار، قال ليها راجلها: آشنو قريتو اليوم؟
قالت ليه: علاه احمد خلانا نقراو؟ ها هو داخل، ها هو خارج
-واحد مبوق كالس قدام التلفزة وكيضحك
قال ليه صاحبو: مالك؟
قال ليه المبوق: دابا هادي تلفزة، و ملي كنسد عيني، كتولي راديو
-واحد السيدة حطات ثوب عند الخياط باش يصوب ليها جلابة
ملي جات تاخذها، قيساتها قدامو وجاتها قصيرة
الخياط عرف راسو قفرها، قال ليها: طواليتي يا العفريتة
-واحد المكلخ سول صاحبو : بغيت نبيع الطوموبيل ديالي 205 بشي ثمن غالي، أش ندير؟؟
قال ليه صاحبو : مسح ديك 205 و كتب مرسيدس و لا بي ام
دازت مدة، سوله صاحبو : إيوا، بعتي الطوموبيل ؟؟
قال ليه المكلخ : واش تسطيتي؟ كاين شي واحد كيبيع البي ام ؟؟!!
-هادا واحد الكداب كيعاود لصاحبو : مشيت أنا و مراتي لافريقيا، وڭلسنا فواحد لوطيل حدا الغابة
فالصباح، ڭلت لمراتي لبسي نهبطو نتساراو، لبسات مراتي حوايجها ف خمسة الدقايق وهبطنا
شوية خرج ليا سبع وانا نضربو بكروشية مات، زدنا وانا نلقا خمسة د السبوعة آخرين
بديت نضرب، ها اللول، ها التاني، ها التالت، وهوما يجيو ڭاع الحيوانات
وانا نطلع فوق الشجرة و بديت كنشير عليهم حتى قتلتهم كاملين
ورجعنا للوطيل، وانا نلقى سبع آخر
...
هنا بدا صاحبوا كيموت بالضحك
سولو الكداب: مالك أصاحبي كضحك؟
ڭال ليه صاحبو: ماحشمتيش تكذب؟ مراتك لبسات ف خمسة الدقايق؟
-علي وبراهيم تشاركوا ف حانوت
واحد النهار، ناض علي علق على الحانوت پلاكة مكتوب عليها بالفرنسية
Alimentation générale
جاء براهيم قرا الپلاكة وكعا، وهو يبدلها ودار فيها
Brahimentation générale
-واحد المعلم عرض على صحابو يجيو عندو للدار
ملي جلسو شوية هدروا، قال ليهم: شنو نسبقو أتاي ولا العشا؟
قالوا ليه: العشا !
هو يقول ليهم: توكلنا على الله نوضو تصليو
