عواشر مباركة مسعودة
رمضان كريم
الله يدخلو عليكم و علينا بالخير و الرزق وندوزوه إنشاء في طاعة الله
غَبتْ شوية على لحباب ونتمنى نلقاكم جميعا بخير وعلى خير..
توحشتكم بزاف و فرحت بالرسائل ديالكم العزاز ..
الكل فرحان بالشهر الكريم و موجدين ليه :
السفوف -سليلو- الزّمِّيطة أو الزٌّمِّيتة - الشباكية - لمخرقة - لبريوات - لبسيطلات - لمسمن على أنواعه ههه العادي أو لمعمر - المخمار-
الكل مضروب على كرشو ليلة أول رمضان الكل في حالة استنفار قصوى بحال إيلا خايفين من المجاعة
ههه
تفكرت قصة عاودوها لي مانعرف واش واقعية أو نكتة والتقليد على اللي حْكاها هههه
" القصة و مافيها أن أجنبي جا من برَّا و زار أسرة مغربية وقت لفطور وكان تيفكّر يقضي شهر معاهم ومْنـــــينْ ؟!
وْصل مع لفطور ديال رمضان و لقى الطابلةعامرة ماعرف منين يبدا ؟
ها التمر و الحليب و العصير و الشباكية البيض مصلوق ولحريرة المْقَوْمة و الطاجين و الحوت مقلي وسلّو و الفْلان القهوة و الشاي و هلم جرَّا ..
شافهم داخلين طول وعرض مع الماكلة
دارْ معاهم الصواب و خْرَج من المعركة بسرعة حيثْ أصلا هو ماتياكلش بالليل ..
شوية تقابلو مع التلفزة و بداو تيْنقبو فالكعيكعات و اللويزات والبيستاش و حاطين آتاي مشَحَّرْ باش يهضم ليهم هههه
شوية شي مشى يصَلِّي التراويح شي خرج يهضم لحريرة شي مشى يتقهوى وصاحبنا خرجْ معاهم وجلسو فالمقهى وكل واحد خدا عصير أو أتاي أو ...رجعو للدار مع 12 ديال الليل و بداو يعمرو الطابلة بما لذ وطاب ، صاحِبُنا خرَّج عينيه مافهمش آش تيديرو
- أويلي يالله دارو لَبلانْ وعمرو كروشهم ههه فين غادي يحطًّو هاد البركة ؟
استأذن منهم ومشى ينعس وقال ليهم bonne nuit
ضرباتو الفيقة مع لفْجر و جاه لعطش مشى للكوزينا و لقاهم تياكلــو تيتسَحْرُو هههه !!
حس براسو بحال إيلا تيحلم ولكن تْأَكَّد بالملموس أنه فايـق !!!
" أويلي مللي جيت وهوما تيصرطو إيلا بقيت معاهم غادي ياكلوني ههه
السيد جِمع باليزتو و رجع لبلادو
واخا عياو مايشرحو لو أنهم غادي يصومو الغد ولكن داك مادخلُّش لدماغو والو!! "
هههههه
المهم اللي بغيت نوصل ليه و اللي كلنا عارفينو
رمضان ماشي غيرديال الشهيوات و التغلاق و الصريط و لَمليط ..
وممارسة الفواحش تحت جنح الظلام بعد الأذان..
تيكونو شي ناس بحال المربوطين غير يوذَّن المؤذن ويمشيو للملاهي والعلاقات المحرمة ..
وفي النهار الصيام هه التناقــض هادا ههه النفاق بعينه !!!!
الصيام هو كَفُّ اللسان عن قول الأذى وحبس الشهوات والعبادة و الصدقة والإحساس بمعاناة الفقراء مع الجـوع !!
بيني وبينكم واش ماكتكتارش لمدابزات ولمخاصمات
بين الناس وخصوصا المقطوعين ؟؟؟؟
وعِوض مايقول الإنسان اللهمَّ إنِّي صائم تينسى راسو وتيعصى الله
وتيندم فيما بعد !!
الله يهدينا و نصوموه إيمانا و احتسابا
ونطلبو من الله يَتْقَبَّل صيامنا وقيامنا
وندوزه إن شاء الله في طاعة المولى
تقبلوا موضوعي بعد غيبتي
مع مودَّتي ياسمين
